Thursday, September 1, 2011

වංශයක කඳුල


ලැටිස් හිල් අතරින්
බේරෙන එලිය බිඳකින්
තෙත මුඩු පොලව මත
ගොම්මන වෙනකම්ම
දුවන ඉර ලප දැකල ඇති මට

බරාඳය එතැනම
මාත් හැම දා මෙතනම
සිලිබිලි හිනා හඬ
මාලි කිරි දෙන විටදි නවතින

මොලකැටි අත් දෙපා
නොදැන මෙය මතු තම උරුම වග
කුස්සි දොර පලුවෙන්
එබී ලැජ්ජා හිනා පූදින

දැන් ඩග්ලස් ගොහින්
හෙටට අවුරුදු දෙකත් පිරුනම
වාසගම මුදලිඳු
ඉතුරු කරගිය පුතෙක් නැතුවම

ඉඳහිටත් දවසක
තුවාලේකට සැරහුමක් මිස
කොන්ඩිස් කුප්පියත්
හිඳිල පතුලට මගේ හිත මෙන
ඉතින් ගම උන්හට
කුමන පල වෙද
නාකි දොස්තර හාමු තව මම

කැම්පස් මල් පාර
ඉඹපු කුලුඳුල් ආදර
හරහට හිටපු වංසෙට
හිත දුවන ගානෙම
වයිර බැඳලම තරහ නෑ මට

ජිවිතේ හැටි වෙන්ටැ
අප්පච්චි මේ මග පව වෙන්ටැ
සනුහරේ කබල් ගාගෙන
ඉන්න පූරුවෙ නියමෙ වෙන්නැති

පොටෝ එක ඉද්දර
ඉන්නෙ දැන් මම විතරයි
නගා ආවට ඉඳහිට
ලංකාව මදි දැන් ඒකිට

ආඩම්බරෙන් නුඹ හිටි
තුත්තිරි ගාල් මිදුලම
උදලු ගෑ නෙල්සන්
තමා පෙලපත් මන්දිරේ ඉඳ
නම ගෙනියන්නෙ මුණුබුරු

"අනේ මාලියෝ
නෙල්සනුත් එක්කා
පන්සල් ගොහිල්ලා
දානෙ බඩු ටික ගෙනෙන් රෑවෙයි,

පොඩි එකා හිටියාවේ...."


උන් අඩි ගියාවේ
සොල්දරේ කලවැද්දො ඔහෙ උන්නාවේ

2 comments:

  1. මදුරන්කුලියට
    එන්න පුලුවන්ද
    මම මුතු කුමාරියෙ
    උඹව බලන්න එන දාට..

    උඹ කියන්නහේ
    "විස්ස විජ්ජාලෙට"
    මම තේරුනු දවසෙ
    ඇස් දෙකෙන් වැක්කෙරුනු
    තාත්තකම අරන්..

    මෝදර පුංචිලට
    උඹව මගෙන් වෙන්කරන්න ඉඩදුන්නු
    කොටහලුවට වෛරයි මං
    දාල ගිය අම්මට වඩා...

    හොස්ටල් එකට
    එහෙමත් දාක ඇවිත්
    බිම බලාන ඉඳල
    දාහෙ කොලයක දෙකක
    ගුලිකරල යන
    උඹෙ අසරණකම
    විසි කරපන් තාත්තෙ පොල්වලකට..

    මැද්ද මල් සාක්කියි
    දෙය්යො උඩ සාක්කියි
    අපෙ කඳුලු තෙලිජ්ජට..

    බාල සංදියෙ වගේ
    ටීච දෝණිට සෙල්ලම් බයි උයන්න
    කඩොල් කුරුල්ලොත් අරගෙන
    මදුරන්කුලියට
    එන්න පුලුවන්ද
    මම මුතු කුමාරියෙ
    උඹව බලන්න එන දාට..

    ReplyDelete
  2. http://lahiruakuratiyage.blogspot.com/2011/06/blog-post_29.html

    ReplyDelete

නොතිත් සිතඹර අරා...

Related Posts Plugin for WordPress, Blogger...